Leev Lütt,

noh langem Hen on Her, Vör on Zoröck hät ons Stadtrot zom sechtleche Verjnöje von de CDU on ehre Vörturner nu doch sinn Zostimmong för de Bau von de Belker Arkade jejowe. Öm dat henzekreeje, wor zwor en jeheeme Afstimmong nödich. Wenn äwwer eene jejlövt hät, dat sech die nix enfalle losse wöhde, öm dat Wonscherjävnes henzekreeje, hät sech dä jedööscht. Deht et stenke?

Wat wor dat vörher för e Jedöns. Alle hadden Arjumente doför odder dojäje: Parteie, En­tresseverbände, Börjer oswosf. Dä Envestor stellden sojar e Enfozelt op on mahden janzsiddije Anzeije en de Daresziedonge, domet hä jo de Opdrach kritt. On och dat Woht Erpressongsversöhk es för em ki Fremdwoht. Na jot, de Belker kreeje jetz ehr Schwemmbad on ne Börjersaal. Dä Envestor well de Verkoofsfläch bejrenze. Wenn et trotzdäm donäwer jeht, weeß ech schonn jetz janz jenau, dat ons Thöringer Jrinsbacke zwor wie emmer för alles zoständich, äwwer för nix verantwohtlech es.

Dat woret för hütt. Bes nähste Woch
Üere
Charle-Manes