De Foßball-WM


Leev Lütt,

de WM es zo Engk. Dank Zizou hant de Italjanos sech de veehde jüldene Stähn jehollt. Klinsmän hät ne ihrevolle dredde Platz erronge. Schapo! On dat trotz miehmolijem Ensatz von Ballack. Dä stung deelwies wie e blend Hohn op'm Spellfeld röm. Bei Chelsea dont se sech doch schonn jetz en de Fott bieße, datse dem jekooft hant.

Dat onselije Jedöns met de Entrettskahte es vörbei; on dat met de offezjelle Sponsore. Die mosste rechtich Kohle latze. Trotzdemm hät dr Bondesjerechtshoff entscheede, dat de FIFA kinn Rechte för de Bejriff "WM 2006" hät. Dat hät die äwwer nit dovon afjehalde, Besöhkers met Kledasch von angere Ferme, die enfach uszetrecke. De plompe Näckefott-Anton "Goleo", dä se besser "Golem" jenannt hädden, deht verschwende. Mer bruche ons nit mieh de dömmleche Enterjuh-Frore von Kerner & Co. anzehöre. Die wore selvs för enfach Lütt en Zomotong. Äwwer dat beste es, mer send endlech dä zweelechtije MV loss.

Dat woret för hütt. Nix för onjot. Bes nähste Woch.
Üere
Charle-Manes