wennste met dr Poss e Paketche ent EU-Usland verschecke wells, nämme se sech Dech doför mennestens 17,oo € af. Dat jildet för alle Paketches bes zo 10 Pongk. De Paketches send domet äwwer automatesch versechert. De Versecherongswäht es wie follecht jestaffelt:

bes  2 Pongk     € 53,59
bes  4 Pongk     € 59,01
bes  6 Pongk     € 64,42
bes  8 Pongk     € 69,84
bes 10 Pongk    € 75,26

Wennste för zom Beispill e Händy von 75,oo €, wat e halv Pongk weecht, noh Spanije verschecke wells, krisse maxemal 53,59 € Ersatz, wenn et fottkütt. Wennste äwwer henjehs on dehs en dat Paketche noch nünn Pongk wähtlose Wackersteen erin, krisse als Ersatz de janze 75,oo €, die dat Händy och wäht es.

De Poss brengt also dat Konsstöck fähdich, dat se eemol nünn Pongk för ömmesöns pöngele deht on zom angere, wenn dat fottkütt, se an de Afsender öwer 40 % mieh uszahle moss als wies beem normale Jewecht. Deht et Üch do wondere, wenn de Akzije von de Poss em Senkfloch send?

Nix för onjot. Bes nähste Woch.
Üere
Charle-Manes