wennste anfängs, Jura ze stodeere, krisse als ehschdes beijebraht, dat Rääsch met Jerechtichkeet nix ze donn hät. On dat Jerechtichkeetsgeföhl es noch e anger Deng. Dat verzällt dech för zom Beispill, dat et rechtich es, wenn Rüttjers Jörjen säht, dat Lütt, die johrelang en de Ärbiedsloseversecherong enjezallt hant, länger Ärbiedslosejeld krieje solle, als de angere.

De jeföhlde Jerechtichkeet säht dech och, dat et ne Kawenzmannsdress es, de Mannesmann-Bande met Boßjelder dovonkomme ze losse. För Ackermäns Jupp send 3,2 Milljone werklech Aapenöss jemesse dodran, wat hä kritt on wat hä enböße wöhd, wenn se dä verknacke wöhde. Essers Kläuske wöhd och ne decke Rebbes make, wenn hä för 16 zo Onrääsch enjesackte Milljone mar 1,6 Milljone Boßjeld zahle mösst. Sinn Bejröndong: Hä hädden de Wäht von de Mannesmannakzije noh bowe jedreewe. Dat de Kors späder noch deefer sonk als vör däm Öwernohmbohei, nömmt dat Fulksoos äwwer nit zor Kenntnes.

Nix för onjot. Bes nähste Woch.
Üere
Charle-Manes