Dat Nawi odder de Scheedong


Leev Lütt,

de Froch "Wä fäht?" es em Nohbereech ki Problem: Hä fäht hen on ette zoröck. Schweerijer wöhdet do, wo mr sech nit uskennt on Stroßekahde brucht. Weil de mieschde Mädches de Landkahde för Schnettmosterbore halde, mösse de Kähls franse. Eenije von denne hant sech drop e Nawi jekooft. So och ech.

Dann jeng es loss - noh Usedom, för öm Urlaub ze make. Et Rösken fäht, on ech loss et Nawi ärbiede. Dat klapp so jot, dat min holde Isolde op emol konstateeht: "Ech loss mech scheede! Ech bruch dech nimmieh! Dat Nawi mäht dat besser als wies do!" Schlock – wat soll ech dodrop sare? Et fällt mech nix en. Mer fahre wieder wie dat Nawi et verzällt.

Doch plötzlech medde en de SBZ op de nüe A 20 säht dat Frollein em Nawi: "Deht mech leed, äwwer hee jehdet nimmieh wieder. Mer send medde en de Pampa!" Wat hät mech dat jot jedonn! Kaht jenomme, wiederjefranst on för mi Altarjeschenk jesaht: "Na, wor dat nit doch e besske vörielich met de Scheedong?"


Nix för onjot. Bes nähste Woch.
Üere
Charle-Manes