dat Reiht för Selvsbestemmong es ne schöne Jrondsatz. Solang et nit jäje dat von angere Lütt odder jäje jöltije Jesetze jeht, kannste donoh donn on losse watte wells. Et jövt äwwer welche, die Selvsbestemmong missverstonn, endäm se nämmech henjonn on selvs bestemme, wievill se för ehr Ärbied nämme. Do send eemol all de Afjeordnete us de verscheedene Palaverbude. Die bestemme selvs, wievill se sech op Koste von de Alljemeenheet en de Täsch deue. Kinn Kontrollinstanz deht die bremse. Dat wöhd nor noch von de Öwerversorjong öwertroffe, die sech die zobellije, die en ons Rejieronge setze.

E besske subtiler dont do de Vörständ on Opsechtsrät von jroße Ferme vörjonn. De Vörständ losse sech ehr Salär vom Opsechtsrot bewellije. On denne ehr Verjötong wedderöm wöhd vom Mänädschmang bestemmt. Motto: "Jöv, so wöhd dech jejowe". Sollte mech wondere, wenn Ackermänns Jupp dat morje op de Haupversammlong von de Deutsche Bank angers hangkhawe wöhd.