Deutsche Sproch – schwiere Sproch


Leev Monika Piel,

letzde Woch es dr Verfassongsbeschwähd, die de Öffensleche Rondfonkanstalte enjeriecht hadden, stattjejowe wohde. De Ussecht op mieh Kohle deht Üch als Entendantin vom WDR secher och freue. Et fällt Üch bestemmp nit schwier, die als wedder för alle möchleche Driss ze verplane. Zom Beispill för Sendonge, wo Üer Reakzjone sech öwer dat schleihde Afschniede von ons Schollpänz em enternazjonale PISA-Verjleech uslosse.

Do hann ech ne bessere Vörschlach: Anstatts dodröwer larmojang ze jammere, solldet Ehr Üch mol an de eejene Nos packe. Wemmer die Sendonge dodröwer hört, kammer nit sare, dat die e Vörbeld send. Koom eene von Üere Nohrechtereakzjone weeß noch, dat enderekte Rede de Konjunktiv bedenge. On Bastes Sick hät sinn Freud dodraan, wie die och noch däm Jenetiv sinne Dot beschleunije. Wenner die janze Reakzionsbajasch zom Volkshochscholl-Kors "Deutsch för Anfänger" scheckt, wöhd dat för de PISA-Misere secher mieh brenge.


Nix för onjot. Bes nähste Woch
Üere
Charle-Manes