dat wor schonn en fuustdeck Öwerraschong als letzde Woch verköndet wohd, dat Jörjen Klinsmän Nohfoljer von Öttes Hitzfeld wöhd. Wat hant de Experte vörher jemotmoßt, wä dat woll wehde wöhd. Wä hät sech nit alles Hoffnong jemaht? Vöredraan ne jewesse Loddar M., Rekord-Enternazjonaler von Berti Vochts Jnaden. Dä deht sech emmer als Ehschte melde, wenn erjens e Tränerpösske vakant es. Äwwer met sinn drettklassije Leestonge deht et och nor för drettklassije Poste rieche.

Noh däm Thiater öm die nit enjehaldene Spendezosare von sinnem Afscheedsspill hant die en Mönche woll för emmer on ewich de Nas von däm Kähl voll. Dä wöhd noch niddens Klinsmän dörchkrieje, dä sech bei dr Zosammestellong von sinnem Tränerteam secher widder jenau so vill Kompetenz usbedonge hann dörft wie als Nazjonalträner. Dat jeng mar öwer Uli Hoeneß' Leech. Dat wedderöm jeht nit, weil dä brucht de Bondeslija onbedengt. Wä angers künnt so schön als Feindbeld herhalde, zomol de Dare von Kahns Olli jo schonn jezällt send?