Frohe Poschde!


Leev Lütt,

mr send en de Karwoch. Öwermorje es Karfriedach, wat de Blauköppe ehre höchste Fierdach es. Am Wochengk es Poschde. Dat es dr höhste Fierdach von de Kathole. Weil sech dr Termin för Poschde von Johr zo Johr ändere deht, nennt mr dat ne bewächleche Fierdach. On all angere bewächleche Fierdäch (wies Rosemondach, Äschermeddwoch odder Pengste) mösse sech nohm Poschtermin rechte.

Vereenfacht jesaht wöhd de Termin för Poschde wie folcht berechent: Zoehsch moss Plöck sinn. 2008 es dat Jröndonnersdach so öm Veehdel vör Sibbe fröh. Dann bruche mer Vollmond. Dä hammer am 21. Mähz so öm Veehdel vör Acht owends. Dr Sonndach drop es Poschde. So enfach es dat. Dr fröheste Poschtermin künnt donoch dr 22. Mähz sinn on dr spädste dr 25. Aprel; zomennes för de wessleche Kerche.

Weil de Orthodoxe dat e besske angers berechne, kann denne ehr Poschde och mol späder stattfenge. Tösche sibbe Däch on fönf Woche. So mösse die heuer doför bes zom 27. Aprel wahde. För all angere hee schonn jetz: Frohe Poschde


Nix för onjot. Bes nähste Woch
Üere
Charle-Manes