wenn sech eene donäwerbenömmt, säht e Sprichwoht: "Benämme es Jlöckssach". Bei manche Lütt jildet dat och för denne ehr Tellefonverhalde. Normal es, dat, wemmer anjerope wöhd, mr sech met sinne Nom odder met sinn Tellefonnommer melde deht. So kenn ech dat. Wenn ech jot drop ben, höht sech dat sojah so an: "Hallo, ech heeß Charle-Manes on Üch wellkomme!"

Dat es nit bei alle Lütt eso. Et jövt Fäll, do dont Anjeropene sech zom Verrecke nit vörstelle. Wennet jot jeht, hörste bestenfalls: "Jo bitte." Kinne Nom – kinn Nommer. Et kann och passeere, dat dat verköhzt wöhd zo nem enfache "Hä! Wä es do?". Wennste dann fröchs, met wämste spröchs, wöhdste jaranteeht zoröckjefrocht, wä do denn bes. Dr Verwies dodrop, dat dr Anjeropene sech zoehsch melde darf, notzt nix. Et wöhd konstateeht, dat do jo anjerope häs on deshalv wesse mösstes, met wämste spröchs. Öwrijens deht och Jauchs Jünther, wenn ne anjeropene Tellefonjoker sech nit rechtich melde deht, däm verzälle wie jode Tellefonsitte ussiehe.