ne Näjer för zom Scheewe


Leev Lütt,

en Delejazjon vom Bondesdachs-Jesondheetsusschoss hät en de Pengsferije en Lustrees noh Kanada on Amerika jemaht. Domet se die äwwer nit selfs bezahle moss, hätse versöhkt, dem Trip ne politesche Anstrech ze jäwe. Öwermäßich Entress an politesche Termine haddense äwwer nit. Krügers Randolph, Sekretär von dem Kreppke, hät de deutsche Jeneralkonsul Rolf Schütte en San Franzisko jeheescht, dat Projramm nit met enhaltleche Termine ze öwerfrachte, domet jenoch Ziet för zor freie Verföjong blifft.

Doför hät dr Usschoss äwwer ne Öwerbleck för Thiater- on Konzähtveranstaltonge jewönscht. On för Enkoofsmöchlechkeete, ensbesongersch för Schohläde. Ne besongere Sörvis jowet för de Jesondheetsexpertin Annette Widmann-Mauz (CDU Tübingen). Die hät trotz jebrochenem Foß an dem Trip deeljenomme. Se kridden eejens ne Rollstohl jestellt. Dä hät ehr äwwer nit jefalle. SPD-Proll Krüger us Potsdam, bölkte drop em Jeneralkonsolat: "Mr bruche ne Näjer för de Rollstohl ze scheewe". Am Meddwoch (21. 5.) wor dat Kreppke dann do op Besechtijongstour. Die met Nancy Pelosi on wiedere US-Afjeordnete verenbahte Termine send ersatzloss entfalle.

Am Engk doht sech Hüppes Bätes (CDU Werne) nit entblöde, dat Konsulat för Bejliedong zom Flochhafe ze ersöhke, weil hä so jot wie ki Englisch künnt.


Nix för onjot. Bes nähste Woch
Üere
Charle-Manes