nit nor Privatlütt on Ferme künne pleite jonn. Och Banke bliewe dovon nit verschonnt. 1974 mosst de Herstatt-Bank us Kölle schleeße, weil se 69 Milljone (Mark!) verzockt hät. De verantwohtleche Malefizi (Ardens Nöppes on Konzohte) mossden ent Kaschott enröcke.

En janz angere Dimensjone bewächt sech dat Fiasko bei halfstaatleche IKB. Die hät sech met Bellejong vom Vörstand on ohne Ensproch vom Opsechtsrot op e Terräng bejowe, wo en deutsche Meddelstandsbank nit henjejöht: Op de amrikanesche Immobiljemaht. Die wore natörlech heelfroh, dat se ne Domme jefonge hadden, däm se ehre Schrottpapeerkes andriehe kunnte. Ratzfatz wore 8 Milljarde (€URo!) fott, on de Bank domet praktesch pleite. Äwwer statts Konkurs anzemelde, es met alle Jewalt versöhkt wohde, de Bank ze stötze. Weil de IKB nu kinn Privatbank es, wohde sovill (Stüer)-Jelder nohjepompt, dat de Schadenssomm op mieh als 12 Milljarde € anstiech!

Weil de Bank domet äwwer emmer noh nit jereddet wor, es de Lade jetz förn Appel on en Ei an de amrikanesche Heuschreck Lone Star verramscht wohde. För alle Risecke, di en de IKB noch drenstecke, es verenbaht wohde, dat die von de deutsche Sitt jedrare wehde – mieh odder wennijer vom Stüerzahler. Künnder mech ens verklamüsere, woröm Ehr die nit hat pleite jonn losse?