wenn sech erjendswo jet nöhere deht, wat nor entfähnt noh Wahlkampf ussüht, kannste Jeft drop nämme, dat bei de Politeker de klore Verstand afjeschaldt wöhd. So och jetz wedder. Do versöhke se sech all als Ärbiedsplatzredder för de Opelaner ze profileere. Vörwächs Rüttjers Jürjen, dä us däm Nokia-Fall nix, äwwer och janix jeliert hät. Dann es do de janze chress- on sozejaldemokratesche Mischpoke en Berlin; jefolcht von de Minesterpräsedente us de angere Länder met Opel-Fabreke.

Wat soll de janze Driss? Dörch die anjedachte Stötzongsmaßnohme för Opel deht mr en däm sieche Endostriezweech Autoendostrie dat Liede mar e besske verlängere. Et könne enfach nit mieh Autos verkooft wehde als jebrucht wehde! On wenn Opel hops jeht, es dat nor jot för alle angere Autoprodozente. Zomol op die Aht on Wies och usjeschlosse wehde kann, dat Ongerstötzongsjelder noh GM affleeße. Och de Zoleeferendostrie wöhd dovon profiteere. Se dann mieh an de angere Autofabreke leefere.

Usserdäm jenöcht zor Lösong des Problems ne enfache Bleck en de Bibel. Bei Mattes 5, Vers 29 - 30 on Markus 9, Vers 43 - 47 steht: "Wenn eens von dinne Jleeder kränk es on dech ze verdärwe droht, rieß et us on werf et von dech, denn et es besser, wenn eens von dinne Jleeder verdörvt als de janze Balch!"