De scheinlejale Afzocke


Leewe Peer Steinbröck,

et es beschammend, dat mer als Börjer emmer de Hölp von de Justiz en Ansproch nämme moss, öm an die Kohle ze komme, de eenem scheinlejal afjeknöppt wöhd. Do es för zom Beispill de Pendlerpauschal, die Ehr de Betroffene solang nit zojebellicht hat, bes Üch dat Verfassongsjerecht jestere doför op de Fenger jekloppt hät.

Dann send do och de öwerhöhte Preise ze nenne, die ons de Enerjie-Olijarche permanent afknöppe. De Prieskorv för Strom on Jas kannt emmer nor een Rechtong: Noh bowe! Öm Bejröndonge, woröm dat so es on nit angersch, wore die nie verläje. Mar de Androhong von en Messbruhksverföjong hät 29 von 30 Jasversorjer, die en de Zoständichkeet vom Bondeskartellamp falle, dozo jebraht, enzelenke on e paah kleene Röckerstattonge ze aviseere. Doför jonnt äwwer alle Konde, för deren Jasversorjer de Landeskartellämpter zoständich send, lier us.

E wiederes öbles Beispill för scheinlejale Afzock deht dann wedder Üer Minesteriom leefere. Wenn ne ärme Börjer mol beem böwerste Finanzjerecht met sinnem Anlieje erfolchreech wor, dann esset beiliev nit eso, dat dat dann als Jrondsatzentschiedong för alle jlichjelarerte Fälle jilt. Enä, dörch minestrijale Nitanwendongserlasse von Üch zwengt Ehr alle Börjer bei jlichahdije Fäll ernüüt op de Klarewäch. Mott dat denn sinn?


Nix för onjot. Bes nähste Woch
Üere
Charle-Manes