hütt es Hellichowend. Morje on öwermorje es Weihnahde. Bei ons on en vill chressleche Kerche op de janze Welt wöhd de Jeboht von Jesses Chrestes jefiert. E paah orzedoxe Kerche fiere nohm alde juljanesche Kalender ehsch am 6./7. Jannerwar. Vör allem die us Abessinije on dem Kopteland, us Armenije on Jeorjie, sowies us Russland, Serbije on de Ukraïne.

De jüddesche Wanderprädijer Jeshua, op däm dat alles zoröckjeht, es veer odder fönf Jöhr vör de späder noh ehm benannte Zietrechnong jebore wohde. Weil mr äwwer de jenaue Dach nit weeß, hannt de verschiddene chressleche Jemeende sinne Jebohtsdach emmer so jeläht wie et enne am beste en dr Krom jepass hät. För de jetzije Dezämbertermin hät sech vör allem de Adapzjon von zietnohe vörchressleche Fierdäch anjebode: dat Fess vom römesche Sonnejott, de Wentersonnewendfiere on et Julfess.

Wie däm och emmer sei, jetz wöhd an onsre on an de orzedoxe Termin nit mieh jeröddelt. Wä well, kann et notze on zweemol Weihnahde fiere. De Weihnahtsjoddesdeenste bei de Orzedoxe send schonn e Erlävnes. Jrod hee en Düsseldorf hammer doför jode Möchlechkeete: Bei de Hellene Am Schönekamp 2, bei de Kopte opm Pöhlewäch 52; b bei de Russe met Ähzbeschoff Longin Talypin op de Ellerstroß 213; bei de Serbe op de Krahneburchstroß 19 b on bei de Ukraïner om Wäschdener Feld 65.