Elena es jekomme. Am ehschde Jannewar. Dat es kinn jriechesche Schönheet, songern de Afköhzong för en brandnüe Datesammlong. Do mösse alle Brötchesjäwer jetz endrare, watse de Lütt, die bei denne op Lohnstüerkaht ärbiede, jejowe hannt. Dat soll de Ärbiedsbeschinnijonge ersetze, die et beslang mar en Papeerform jov. Wenn erjens e Amp die Date benödicht, bruch mr kinn Papeerches mieh eranschleppe, weil dank Elena künne die de Date -met Zostemmong von de Betroffene- tirekt von de Zentrale SpeecherStell afrope. ZSS so heeßt de jroße Broder jetz. So wiet – so jot, zomol dodörch och Messbruhksversöhks ongerbonge wehde künne.

Wat nit so jot es, es all dat, wat do söns noch enjedrare wehde soll: Alle Fählziede on of Striekdare berechticht send odder nit, Afmahnonge on usföhrleche Erklieronge von Köndijongsgrönd on sojet mieh. Dat verstößt jäje dat Rääsch op enformazjonelle Selfsbestemmong. Dodörch kreeje mer Zoständ wie bei Orwells Schorch en sinnem Roman "1984".

E paah Jewerkschafte hannt schonn jesaht, dat dojäje jeklacht wehde soll. On och Schaars Pitter, de Beopdrachte för Dateschotz, es dojäje. Erjenswie hät ons Rejalt och de Beförchtong, dat se domet bei de Jerechte op de Schnauze fleecht. Doröm hannt se von sech us schonn jesaht, dat se nohbessere wolle.