Dorschlosspanik bei de CDU


Leev Jürjen Rüttjers,

am 9. Mai des Johr hammer Landdachswahle en NRW. Bes dohen send noch dree'enhalf Woche. De Prochnose sichnaliseere e Patt zwesche Schwazz/Jäl eenersitts on de Rot/Jrön angerersitts. Weil et äwwer höchswohrschinglech es, dat de Lenke mieh als wies 5 Prozent kritt, wehde beede Larer kinn rejierongsfähije Miehheet zosammekrieje. Domet es so jot wie secher, dat Ehr nit so wiedermache künnt wies besher.

Dat widderöm hät zor Folje, dat bei Üere Chressdemokröte jetz Dorschlosspanik opkömmt. Mr kann et doraan sünn, dat de CDU Üer Schwitt jetz noch schnell ne Hoope lukrative Pöstches zojeschanzt hät. So hät ne Rejierongssprecher von Üch hütt och zojäwe mösse, dat jrad nochens zehn anjestellte Metärbieder ent onköndbare Biampteverhältnes befördert wohde send.

2005 hadder 97 nüe Stelle bei de Landesrejalt jeschaffe, öm do Üer Jefolchschaff ongerzebrenge. Domols sahden Ehr, dat dat alles befrestete "kw"-Stelle seie on bliewe. Ehr versprocht, dat die en fönf Johr spätsdens widder wechfalle wehde. Die fönf Johr send jetz eröm. Wat es passeeht? Nix! Kinn eene von die 97 Stelle es mieh befrestet. 72 dovon wohde schonn 2008 verbiampted. "kw" deht also bei Üch doch nit bedüüde "könftich wechfallend", songern "kräftije Wollstand". Jürjen, Ihrlechkeet on Kompetenz sünn angers us!


Nix för onjot. Bes nähste Woch.
Üere
Charle-Manes