wenn sech bei ons en poncto Sörvis wat deht, wat de Konde frömmt, wöhd mr hellhörich. Wenn dat dann och noch bei de Telekom passeeht, frächt mr sech automatesch, wat woll dohenger steckt. So och ech als mech Telekom-Baas Obermän letzde Friedach mailte, dat hä sinne Sörvis verbessere well. Als ehschde Schrett hädden hä de kostepflechtije Sörvisnommere 01805-373 750, 01805-345 345 on 01805-305 000 afjestellt. Doför jäwet jetz de kostefreie Nommer 0800-330 13 00. Schön!

Do et äwwer noh dem Jrondsatz von Leonard Ayres, dä späder och Nobelpreisträjer Milton Friedmän verträde hät, heeßt: "Sojet wie e frei Esse jöwet nit!" ben ech messtrauesch jewohde, dr Sach nohjejange on vörjestere och föndich jewohde. Do wor Haupversammlong von de Telekom. On do hät sech dr Telekom-Vörstand en nüe Jehaltsstruktor verpasse losse. Donoch send mar 40 % vom Salär fest. 30 % send vom Errieche von kohzfrestije Jewennziele afhängich. De ressleche 30 % baseere op weeche Faktore. Dozo wehde och Kondezofreddeheet on Kondelob jezällt. Dat also es des Pudels Kähn!

Ejal, wenner jetz trotzdem noch op alde 0180-er Nommere bei de Telekom stoße doht, bruchder bloss 0800-330 13 00 ze wähle on Üch von do us wiederverbenge losse. On 0800-330 10 09 es eene von de kostefreie Faxnommere. Allemasch!