de Foßball-WM wörft ehr Schadde vörus. Wo mr dat draan merke kann, es de Sammelbeldches-Akzjon von Panini. Dat es ne italjenesche Verlach, dä zo jröttere Sportsereichnesse Sammelalbe erusbrengt, die dann met entsprechende Beldches jeföllt wehde mösse. E Albom met de ehschde 6 Beldches dren koss 2 € on e Blöske met fönf Beldches 60 Cent.

Dat künne sech fossballbejeisterte Blare von ehr Täschejeld leeste. En e Albom mösse äwwer 640 Beldches enjeklävt wehde. För öm dat voll ze kreeje, mösse also mennesdens 78,20 € opjewandt wehde. Dat wör de Idejalfall, wemmer en si 60 ct.-Tötches nie Dubbelde dren hätt. Weil äwwer de Panini-Schubijacke von de 640 Beldches e paah afsechtlech verknappt hannt, kammer ne Komplettsatz nie zom Mendestpreis kreeje. Notjedronge moss mr mieh on mieh Blöskes koofe, wat automatesch de Anzahl von dubbelde Beldches erhöht.

För öm en Sammlong jönstich ze vervollständije, donnt de Puute de Dubbelde nu enfach tuusche. On hee hadden Waljenbachs Wellem met sinnem Huushaltswarelade en Eller en jode Idee. Zenger Anfang Mai hät hä vör sinnem Lade en Tuuschbörs enjerecht. Do treffe sech jede Samsdach von elf bes eens de Panini-Pänz on dont ehr Dubbelde tuusche. Die Akzjon es voll enjeschlare on föht do räjelmößich zo nem rechtije Tuuschjetömmel.