Pizzeria-Test för de Katz


Leev Lütt,

en de Verenbarong zwesche Üch on de Verbruhkerzentral vom 31. 07. 2007 steht en Artekel II dat Ehr alle notswendije Maßnahme erjriepe wehdt, domet de Minsche Läwensmeddel jenieße künne, ohne dovör fies sinn ze mösse, odder Angs vör jesondheetleche Beenträchtijonge hann ze mösse. Domet de Verbruhkerzentral dem hehre Ansproch och nohkomme kann, krieje die jäddes Johr 9 Milljone € von Üch.

Domet künne die jot ärbiede. So hanntse för zom Beispill letzde Mond Pizza-Sörvisse jetestet. Met 60 Bestellonge. Erjävnes: Bei 72 % wore de Leeferonge nit eso wie se eejenslech hädden sinn solle. So wiet – so onjot, denn et wohd nit jesaht, welche Pizzeria nu jot wor on welche nit. Trybas Schorch, dä de Test jemaht hät, deht zom Verrecke nit met de Nome erusröcke. Befrocht waröm, säht hä, hä mösst de Pizzerias schötze, die schleiht wore. Denn wenn hä die benenne wöhd, mössden die Ömsatzenboße hennämme.

Rechtich. Äwwer et kann doch nit de Senn von sonn Akzjone sinn, schwatte Schöp ze schötze anstatts de Verbruhker ze hölpe. De Presseafdeelong von Üerem Minesteriom säht dozo, ehre Nom wör Hase on se wössden von nix. Weil et de Verbruhker schonn entresseere deht, of dat so en Üerem Senn als böwerste Verbruhkerschötzer en NRW es, sünn mer Üere Stellongnohm met Entress entjäje.


Nix för onjot. Bes nähste Woch.
Üere
Charle-Manes