Wat wör passeeht, wenn …?


Leev Lütt,

de enternazjonale Finanzmärkt driehe emmer so e jroß Rad, för öm op Düwel kommerus ne Rebbes ze mache. Do mache die vör nix Halt. On wennet dann scheef jeht, send de Stüerzahler die, die de Zech bezalle mösse. Weil sech de Rejalts widder mol von de Banke öwer de Desch hannt trecke losse. Emmer met dämselve Dotschlacharjument: Et jöv kinn angere Lösong als die, dat de Staat enspröngt, weil et öm de Rettong von erjendsjet jeng, wat systemrelevang wör.

Dat es jelore. En Werklechkeet jehdet Ackermän on Konzohte nor doröm, dat de Staat bezallt, wenn denne ehre Zockerpapeere notleedend jewohde send. Wat wör passeeht, wenn ons Rejalt de IKB odder de HypoReal nit met Milljardesomme suteneeht, songern enfach hädden pleite jonn losse? So wie Amerika de Lehmän-Bröder? Haupleeddrarende wöre dann de Banke on de Hedschfongs jewese. On die Privatanläjer, denne dat Verspreche von höhdere Rendite de Köpp so vernäwelt hät, dat se de Risike do nimmieh jesenn hann.

Datselve wör passeeht, wemmer de Hellene en de Staatsbankrott hädden schleddere losse. Dann hädden och Banke, Versecheronge on enstituzjonelle Anläjer för ehr Zockerei jrodstonn mösse. So wies beem Staatsbankrott von Arjentinije 2001/2002. Mar wenn die do latze mösse, deht sech an denne ehr Verhalde jet andere.


Nix för onjot. Bes nähste Woch.
Üere
Charle-Manes