Deutschland schafft sech af


Leev Lütt,

schonn vör sinnem Erscheene am Mondach des Woch jowet Riesepalawer för zom nüe Boch von Sarrazins Thilo. Et es erschreckend, wievill Lütt, die sech zom bondesdeutsche Föhrongspersonal zähle, statts sech met de Fakte en däm Boch usenangerzesetze, enfach nor onsubstanzjell erömkrakeele. Wenn "Entellenz de Fähichkeet es, jejäwene Fakte ze erkenne on zozeordne", kann ech denne dat Attrebut "entellent" nit zobellije. Usser die Dommköpp jövdet natörlech och noch Opportuneste mangs de Schreier. Dat send die, die sech persönlech jet dovon verspreche. Beem betroffene Prekarijat kann ech dat noch verstonn. Bei Polliteker odder sonn Lütt wie Axel Weber, Baas von de Bondesbank, fend ech dat enfach zom Kotze.

Jottseidank jövdet och Lütt, denne de Verstand nit afhande jekomme es. Altkanzler Schmidt hät dozo jesaht "dat de deutsche Zowanderongspollitek kinne Uswees von pollitesche Klochheet wor". On Broders Drickes, jödesche Poblezest, deht dat "als ehschde Hexejachd en Deutschland zengerm 17. Johrhondert" subsemeere. De Schreftstellerin Thea Dorn wirft de pollitesche Klass en däm Zosammehang "mangelnde Streitkultur" vor. On de muslemesche Sozjolorin Necla Kelek konstateeht, "dat hee ne verantwohdongsvolle Börjer bettere Wohrheete usjesproche hät".

Wie sahden Lasalles Ferdi, Jröndervatter der Sozjaldemokratie on somet och Vörjänger von Jabriels Siggi on de janze Föhrongsmischpoke en de SPD, dereenst so schön: "Alle pollitesche Kleenjeesterei besteht em Bemäntele on Verschweije von däm, wat es." Reiht hätte – allzo reiht.


Nix för onjot. Bes nähste Woch.
Üere
Charle-Manes
 
 
 
Google Street View