"From Zabche with Love"


Leew Lütt,

letzde Schabbes send de wahren Frönde von de echte Popmusik hee als widder op ehre Koste jekomme: De Popolskis us Zabche en Pole (fröher Hindenburch / Schlesijen) live on en Färv. Em Zakk. De Vörstellong total usverkooft. De Lade wiet vörem Bejinn rabbelvoll. För öm ne Platz vöredraan am Podiom ze kreeje, moss mr lang vörher do sinn. Wä em Fänklub es, weeß dat on rechtet sech drop en. Wies Hankels Anne us Meerbosch on Rumeys Melli us Möllem. So wore se och hautnoh draan, als sech Sänger Ändi von de Böhn us tirekt ent dechtjedrängte Poblekom falle lösst on do bowe op Hängk on Ärm von de Besöhker dörch de janze Saal jereecht wöhd.

Äwwer och alle angere komme en de Jenoss von nem exzellente Popkonzäht. Enjebeddet en de Jeschecht von Opa Pitter Popolski, dä vör öwer hondert Johr met de Melodei "Ei dobrze, dobrze dralla" ("Schöne, schöne Maid") de Jrondsteen för de Popmusik weltwiet jeläht hät. Verzällt wöhd die schräje Story, die och schonn miehfach em Fähnsiehe ze senn wor, von Haremäns Achem. Hee als Popolskis Päule am Schlachzüch. Och Baas von de Popolski JmbH en Düsseldorf. Op de Worrenger Stroß. N° 63. So wies Mark Jrieß, dä us de Quetschkommod de Poptön erushollt.

De mieh als verdeente Beifall am Engk reeßt nit af. Us jodem Jrond. De Fäns wesse, bei de Zojov jövdet als Höheponkt Opa Popolskis Stöck vom schöne Mädche, dat en Zabche opm Maht Kehsche verkoofe deht. Dä Song es de Popolskis von Bohlens Didi on Tommy Anders jeklaut on ohne Quelleanjov on ohne Zahlong von Tantjäme onger dem Titel "Cherry Cherry Lady" von die zwee Halonke widderrääschlech vermarktet wohde. Dat Onrääsch schreit zom Hemmel.


Nix för onjot. Bes nähste Woch.
Üere
Charle-Manes
 
Popolski