Sonndach, dä 11. Mähz 2012, hät de Verbandsdach von de Historesche Schötzenbroderschafte en Läwerkuse beschlosse, dat schwule Könichspäärkes en Schötzezöch nimmieh zosamme vörewächs metmarscheere dörfe. 450 Stemme doför. 18 Enthaltonge. Dojäje 28. Dat send mickrije 5,6 %. Wie es sonn Miehheet för dä Beschloss zosammejekomme? Doför moss mr ehschdens wesse, dat dat Kredo von de Schötze „Jlöv – Sitte – Heemot“ es, on dat dat zweddeens ne zodeefst katholesch jeprächte Lade es. Iherne Jrondsatz bei alle katholesche Orjanisazjone es nu äwwer, dat Jlöv nix met de chressleche Heelsliehr odder met Nähsdeleev ze donn hät, songern alleen met Jlöv an de Una Sancta Ecclesia. De Eene Hellije Kerch. Äwens de alleen selichmachende römesch-katholesche. Noh‘m Selvsverständnes von Kochs Heiner us Eller, jetz Beschoff en Kölle on rheinesche Schötzebaas, send Päärkes alleen doför op de Welt, öm Nohwochs ze prodozeere. Möchlechst römesch-katholesche. Dat äwens donnt schwule odder lesbesche Päärkes nit.

Also jehöre die bekämpft on elemineeht, wo on wie och emmer dat möchlech es. Fröher wor dat enfach. Do jowet eemol de hellije Enquisezjon. Zom angere en duusendjöhrije Orjanisazjon. Beeds hannt so e Problem plöck on radekal erlädicht. Hüttzedach es dat bei ons nimmieh möchlech. Do moss jetz janz schön höhsch mem Höhnerkläuke vörjejange wehde. Offesechtlech jövdet mangs de Schötzeböwerschde jenoch Dönnbrettbohrer, die sech de kerchleche Doktrin ooredeeneresch zo Eeje jemaht hannt. Denne esset ejal, off ehre -woll en vörusielendem Jehorsam- jefasste Beschloss en Tiskrimineerong es, die massiv jäje et Jrond- on Minscherääsch verstoße deht. Et es mar jot, dat mangs de jemeene Schötze vill send, die dat nit so sünn. Wollemer hoffe, dat die sech met ehr etwas angere Opfassong von Minschewöhde en ehre Vereene dörchsetze künne.