en minn Jurendziet kom de speeleresche Söhk von ons Pänz noh möchlechst lange Wöhder nie an de “Donaudampschefffahtsjesellschaff“ vörbei. Dat kunnt nor noch dodörch jesteijert wehde, dat mr dem Woht ne „Kapitän“ henge draanjehängden. So eene sollt ech jetz endlech mol persönlech kenneliere. Weil, des Johr wollden minn holde Isolde on ech Urlaub op de Donau mache. En Scheffstour von Passau noh Budapest on zoröck. Zo minnem 75. Dobei wöhd dann secher minne Jurenddroom ze fenge sinn: Ne ächte Donaudampschefffahtsjesellschaffskapitän.

Met dat schönnste an sonn Faht es de Vörfreud on de Urlaubsplanong. Mem Termin woret enfach. Öwer minne Jebohtsdach. Et Ziel wor och klor. Jetz mosst nor noch de passende Veranstalder jefonge wehde. Also Katalore von verschiddene Jesellschafte stodeeht. Erjävnes: Em Jroße on Janze jliche sech de Fahde wies ee Ei dem angere. Marjinale Ongescheede. Blifft noch, de jönstichste Tour ze fenge. Och dat wor schnell klor: Phoenix-Reise. Die jäwe nämmech 10 % Rabatt för wennste op de Tour ne ronde Fierdach häs. “75 Johr es jo ne ronde Fierdach“, so dachden mer, äwwer nit Phoenix. För die zälle nor de Zehnerfierdäch. Selwerhochziede on Dreehveedeljohrhondertsjebohtsdare jehöre nit dobei. Dann äwens nit. Weil et bei nicko-tours henjäje ne Super-Fröhbocherrabatt von 100 € jov, hammer dann bei denne jebocht. Nünn Mond vörher. Somet wor alles klor. Mer freuden ons op dr Urlaub. Bes em Mähz. Do kom en nüe Rechnong met Drievstoffzoschlach. Autsch. De nähsden Röckschläch jowet je nöher de Affahtstermin kom. Zoehsch wohden de Tickets en Ziedonge met 300 € Nohlass anjebode on dann sojah met 400 €. Zosätzlich wore do dann och noch de Bahnfahde bes Passau on zoröck met dobei. Von Drievstoffzoschlach kinn Red. “Dat kannet doch nit sinn“, sach ech för nicko, “dat ech als Fröhbocher jetz blöd dostonn on domm us de Wäsch kick“. “Doch“, säht nicko, “dat Scheff wor nit usverkooft. So fonkzjoneeht äwens Mahtwehtschaff“. Dank för de Liehrstond. Doch annesons wor dat Toürke en Ordnong.