jädes Johr datselve Thiater. Spädesdens bes zom 31. Mai mosste dinn Enkommestüererklierong afjejäwe hann. Zomennes dann, wennste kinne Stüerverröder häs. Met, hässe Ziet bes Silvester. För öm bei de Stüererklierong alles rechtich ze mache, kridder jetz hee a paah wechtije Henwiese:

Jrondsätzlech send alle Ennahme, die de stüerleche Jrondfreibedrach (8.004 € för 2012) öwerschriede donn odder nit jemöß en angere Bestemmong us § 3 Enkommestüerjesetz dovon usjenomme send, ze verstüere. Dat jildet och för Ennohme us illejale Tätichkeete! Besongersch dann, wenn et räjelmößije Enkönft send. Wennste also för zom Beispill et sonn- on fierdächs emmer schön en de Kerch jehs on dech, wenn de Klengelbüdels erömjereecht wehde, stets jet rusnämme dehs, so send dat "Sönstije Enkönft". Die mösse en Zeil 4 op de "Anlach SO zor Enkommestüererklierong" anjejowe wehde. Do bruchs kinn Angs ze hann, dat dech dat Finanzamp verrode deht. Dat dörfe die nit. Zomennes solang nit, wie et sech nit öm e Kapitalverbreche handele deht - wies Mord odder Dotschlach. Och dinn Stüererklierong fällt onger Stüerjeheemnes! Janz em Jäjedeel! Weilste dat jo räjelmößich mähs, kannste alle Koste, die dech dodörch entstonn (wies zom Beispiel för Fahde zor Kerch on so jet), als Werbongskoste stüermendernd afsetze. En Zeil 6. Dat Finanzamp säht doför janz klor: "Werbongskoste send alle Koste zom Erwerb, de Erhaldong on Secherong von Ennohme".