De 0180er-Vörwahle
 

Fröher wore die mieschde Fähnjespräche met 0180er-Vörwahlnommere jönstijer als die met de normale Vörwahle. Enzwesche send de Tellefonkoste kräftich jefalle. Zom angere tellefoneere vill Lütt zo nem Pauschaltarif. Deswäje künnte de 0180er-Nommere eejenslech fottfalle, zomol de Anjeropene dodraan nix verdeene. Mar de Tellekom profiteeht dovon. Weil mr äwwer de Lütt öwer 0180er-Nommere so schön en de Callcenters kritt, wehde ons die woll noch en Ziet erhalde bliewe.

De Koste för ne Anrop ussem Tellekom-Fessnetz send em Momang (Fröhjohr 2008) wie folcht:

01801
3,9
€uro-Cent pro Menutt
01802
6
€uro-Cent pro Anrop
01803
6
€uro-Cent pro Menutt
01804
20
€uro-Cent pro Anrop
01805
14
€uro-Cent pro Menutt

Och bei de Tellekom on de Poss (enschleeßlech de DHL-Päckches-Dauter) jäwe se de Konde fass emmer nor de 0180er-Nommere an. Wenn Buttjereits Fritz von de Poss-Pressestell op dr Bonner Stroß 29 (dredde Etasch) en Düsseldorf-Holthuuse dozo säht, dat ehre Pröfonge erjäwe hant, dat de mieschde Konde von denne domet zofredde send, deht dat stärk an Churchills Ussproch "Jlöv kinn Statestik, dieste nit selvs jefälscht häs" erennere. Wenn se dann noch usföhre, dat de 0180er-Nommere och deswäje beibehalde wehde, domet de Metärbieder op de eenzelne Deenststelle nit dörch Anröp von Konde jestört wehde, deht dat bedüde "Mr künnt so schön ärbiede, wenn nor de Konde nit wöre".

Em Enternet jövt et en Heemsitt, wo mr för vill 0180er-Nommere de normale Vörwahle fenge kann: "www.tk-anbieter.de". De Poss-Pressestell en Holthuuse stott do öwrijens och dren. Ehr künnt se jo mol besöhke odder anrope (0211-98 89 92-29 odder -52 on -53) on denne sare, wat Ehr von ehre 0180er-Vörwahl-Nommere halde doht.

Charle-Manes