(so för 2 bes 3 Lütt)

Wat mr brucht:
1 Kopp Schaffu (Wersing)
1 Ölk (meddeljroß)
1 ½ Pongk Ähpel
0,2 l Sahn
ne TL jekörnte Bröh
ne EL Ferkes- odder Jänseschmalz
60 Jramm Botter
Moskat, Peffer on Salz för zom Wöhze
jet fresche Brodwohsch
Mostert on Alt

Wie mr et mäht:
Zoehsch vom Schaffu de üssere Bläder entfähne.
Dann de jröttere Bläder afzoppe on de Rebbe dovon russchniede.
Nu dat Hähz vom Schaffu zerdeele on de Strongk erusdonn.
Anschleeßend alles en Striepe schniede on en kalt Wasser wäsche.

Donoh kütt dat Janze zosamme met e besske Wasser on de
jekörnte Bröh en ne jroße Pott, wodren et weech jekocht wöhd.
Nohm Afköhle dörch ne Fleeschwolf driehe.

De öwrichjebleewene Jemösebröh äwwer noh nit fottschödde.

Nu de Ölk feen hacke on em Schmalz so andönste, dat se nit brunn wöhd.
Die dann beem Schaffu dobeidonn on opkoche losse.

En de Zwescheziet de Ähpels schälle
on zerka 20 Menudde en Salzwasser jar koche.
Anschleeßend de heeße Ähpels mem Dämper stampfe
on met de Botter zosamme opschlare.

Dä Ähpelsbrei nu onger de Schaffu jäwe on de Sahn dobeidonn.
Met freschjereewene Moskat, Peffer on Salz wöhze on alles jot verröhre.
Nochens opkoche losse. Wenn de Brei zo deckflössich es,
kammer jet von de öwrich jebleewene Jemösebröh dobeidonn.

De Brodwohsch en en Pann brode.

Dann alles zosamme op dr Desch.
Jet Mostert dobei on e lecker Alt för de Verdauong.

Jode Honger!