wemmer jet schosselich es, kann dorus ne fiese Schade entstonn. So esset mech erjange - on Üch woll och. Bei mech heelt sech dr Schade en Jrenze. Wennijer als 50 €. Bei Üch jenget öm mieh.

Ech hatt en nüe EC-Kaht för mi Konto jekrett. Op dem Breefke, wat dobei wor, stung drop, dat mr de alde Kaht vernechte soll, wemmer die nüe en Bedriev nömmt. Hann ech jemaht. De Schier jenomme on dörchjeschnedde. Dat böse Erwache kom, als ech met dem Jeldchip, de op de Kaht es, jet bezahle wollt. Nix drop! Dat wor noch op die alde Kaht, die ech zerschnibbelt hadden. Nochens op Üer Breefke jeluurt on fessjestellt, dat do jesaht wöhd, dat mr vörher de alde Jeldchip entliere soll. Dat wor äwwer nit besongersch hervörjehowe, so dat mech dat beem Quierläse nit opjefalle wor. Domet anger Konde sojet nit passeht, schloch ech vör, dä Satz hervörzehäwe. Am beste met jroße fette rode Bochstawe.

Ehr haddet letzde Mond ne alde Tresor zom Verschrodde jejowe. Do es dann opjefalle, dat do noch jede Menge Kohle dren wor. So öm de 170.000 €. Jottseidank hannt die Üch dat zoröckjejowe. Do send och 3 % Fenderlohn ze verkrafte. Deswäje minne Rotschlach, op Üere Tresore Scheldches dropzekläwe met: "Vörm Verschrodde ze liere". För die 2 Verbesserongsvorschläch dörfter mech rohich jet öwerwiese