"Pro Reli" jescheitert - Jottseidank


Leev Lütt,

letzde Sonndach es en Berlin de Volksentscheed "Pro Reli" jescheitert. Et jeng doröm, dat Relejon af de ehschde Klass Pflechtfach wöhd. Bes dohen wor et freiwellijes Wahlfach. On en de Klasse 7 bes 10 wor Ethik ordensleches Liehrfach. Et jov Jrönd doför on dojäje. Prommente Beföhrwohder on Jächner. Doför: Merkels Anchela, Jauchs Jünther on dr 16. Benedikt. Dojäje: Börjermeester Wowereit on Jysis Joris von de Lenke.

Hauparjument von de Beförwohder: Dörch staatlech beopsechtichte Relejonsongerrecht künne fanatesche Dochmateker dovon afjehalde wehde, denne Pänz enzetrechtere, dat janz alleen ehre Jlöv de eenzich wahre Liehr wör. On alle angere Anschauonge seie vom Öwel. Dat hät jet för sech. Äwwer et es zo kohz jespronge. Denn dat verkönde de verschiddene Relejone trotzdäm. Sowoll en de Koran- on Talmod-Schole als och em Kommelejons- on Konfermandeongerrecht.

Mer wesse doch all, wievill Not, Elend, Kreeje, Onjerechtichkeete osw. zenger Minschheetsjedenke em Nome von Relejone verövt wohde send on emmer noch verövt wehde. Wievill besser wör et do, denne Blare em Ethikongerrecht de eenzich wahre Weltanschauong ze vermeddele, met dr de janze relejös verquaste Driss sinn Exestenzberechtijong verlör:

"Wat do nit wells, dat man dech do,
dat föch och kinnem angere zo"

Ponkt.


Nix för onjot. Bes nähste Woch.
Üere
Charle-Manes