wemmer am Wocheengk ne Usfloch en de Altstadt mäht, kammer se nit öwersenn: De rösije Kreppkes, die do de Afscheed vom Jongjeselle- odder Joffere-Dosinn fiere. Dat feng janz harmloss an. Vor e paah Jöhr trocke de ehschde Afscheednämmer met Braut odder Bräutijam dörch de Altstadt on hadden Spaß an de Freud.

Äwwer dann moss sech de Jedanke, so Afscheed ze nämme, erjenswann verselvsständicht hann. Emmer mieh –och von jwd– fande dat en dolle Idee. Do künne an nem Wocheengk schomol mieh als wies 100 Stöck zosammekomme. En dem Besträwe, möchlechst de orjenellsde Fier op de Been ze stelle, losse die sech enzwesche de dollste Sache enfalle. Hölp wöhd enne dobei och ussem Enternet zodeel. Op verschiddene Plattforme (z. B. www.hochzeitmile.de) kannste alles fenge, watste bruchs odder wesse wells.

De Nohdeel dovon es, dat de fröher öwleche Polterowende emmer mieh us de Mod komme. Die wore schönder on jemötlecher. Do kunnste alle, die en erjendwelche Betreckong zo de Brautlütt stunge, onverbendlech oploope losse. Mr kunnt met Verjnöje sinn, wies sech de Brautlütt öm dat zerdepperte Porzelling kömmere, jet töttere, lecker Bierkes drenke, Häppkes mümmele on och sinn Jeschenke losswehde. Wat mach ech jetz met dem janze alde Polterporzelling, wat ech noch em Keller hann?