ne €URo-Kataloch för zo Weihnahde


Leev Lütt,

op de ehschde €URo-Mönze, die jeprächt wohde, stung als Johreszahl 1999 drop. Als Jröschelkes tatsächlech em Handel jekomme send die äwwer ehsch 2002. Sofott hannt dann och Mönzfrönde domet anjefange, die ze sammele. Kohz drop jowet dann och schonn Katalore, die sech met däm nüe Sammeljebiet befassden.

Dat wor och notwendich, denn us de anfangs 15 €URo-Länder send enzwesche 19 jewohde. Zo de urspröngleche acht Korsmönze es ne riesije Bärm von Sondermönze dobeijekomme. En alle möchleche Nennwähde zwesche 25 Cent on 50 €. Do send die onzällije Joldmönze noch nit met dobei. Ohne Kataloch hässe kinne Öwerbleck mieh. Von all de Katalore, die et dozo bei ons jov, send 2wee nennenswähde öwrich jebleewe: Ussem Leuchtturm-Verlach de "Euro-Katalog" (2010: ca. 428 Sidde för 7,95 €) on us em Verlach Battenberg-Gietl "Die €uro-Münzen" (2010: 1.200 Sidde för 19,90 €).

Welchem dovon soll mr nu sinnem Sammlerfrönd för zo Weihnahde hole? Dat es janz enfach: De Leuchtturm es bellijer, äwwer nit so usföhrlech. Beispill: Bei de Dokumenta-Mönz saren die, dat de Rangkömschreft en nünn Sproche drop es. Beem Gietl steht äwwer dobei, öm welche Sproche et sech dobei handele deht. Doht also dat nämme, wat Üch Üere Frönd wäht es. Em öwrije jehöre de Jold-Mönze en ne eejene Kataloch.


Nix för onjot. Bes nähste Woch.
Üere
Charle-Manes