letzde Donnersdach hät de UN-Secherheetsrot Sankzjone jäje Libyje beschlosse. Zehn Stemme doför on fönf Enthaltonge. Mangs denne, die sech enthalde hannt, wor näwer Russland on China och Dütschland. Zwar hadden Merkel on Westerwelle vörher noch vollmondich verköndet, dat dr Vernechtong von Freeheetskämpfern dörch de Oberst Muammar al-Kadhafi [Schrievwies von sinnem Nome so wie en de offezjelle dütsche Versjon von sinnem "Jröne Boch"] Enhalt jebode wehde moss. Jot! Äwwer waröm Dütschland dann doch nit för die Reselozjon jestemmp hät, enttreckt sech allen Versöhks von ner loreschen Bejröndong. Zomol en dütsche Zostemmong nit och automatesch ons Deelnohm an die beschlossene Maßnohme beënhaldet hät.

Blifft fesszestelle, dat de Westerwelle en hengerfotzije on feije Mämm es. Wenn nem ampteerende Usseminester de entsprechende Beispeele us de Jeschechte, on seie et bloss die ussem letzde Johrhongert, nit jelööfich send, moss mr sech frore, wat sonne Mann för dat Amp qualifizeere deht, zomol hä de Jräuel vom Balkankriech 91/95 jo och noch selfs meterlävt hät. Nix. Afjesenn dovon, dat hä Föhrer von en Menderheetspartei es, die de Chresskonservatewe an de Macht jehowe hät.

Selfs Mahatma Jandhi, dä weltwiet als onömstriddenes Vörbeld vom freedleche Widderstand jilt, hät sinnerziet konstateeht: "Jewaltlossichkeet es besser als Jewalt. Äwwer Jewalt es besser als Feichheet!" Et wor wahrlech kinn Stähnstond för de dütsche Ussepolletik. On Jottseidank donnt enzwesche och ne Hoope von Bondesdachsafjeordnete, die nit so charakterloss send wies de Liberalenbaas, dat och so sünn. Mangs denne och Bondesdachsbaas Nöppes Lammert. Schapo!