Roocherklubs ade?


Leev Lütt,

nohdäm dat Nitroocherschotzjetz NRW 2008 en Kraft jetrode es, hannt ne Hoope Kneipe dat Jesetz dodörch ömjange, dat se erklierden, se wöre jetz ne Roocherklub. Dank de Methölp vom Jaststätteverband wohden dat emmer mieh. Zwar hadden de Kneipers zoehsch wennesdens noch versöhkt, e besske dr Scheen ze wahre, dat se ne rechtije Klub wöre. Wäjens onjenöjende Kontrolle dörch de Behörde jenöchde et jedoch zom Schloss, sech enfach e Scheldche "Roocherklub" an de Dör ze pappe. Dat dat op Duer nit jot jonn kunnt, loch klor op de Hangk.

Eemol alleen deswäje, weil em § 7 drenstoht, dat de Uswerkonge von däm Jesetz noh dree Johr von de Landesrejalt öwerpröft wehde mösse on de Landdach dodröwer ze enformeere es. So blöd es ons Rejalt nu och nit, dat se sonne Messbrüch nit merke wöhd. Zom angere es do och noch de Justiz. Et wor zemmlech klor, dat von dä Hoope Klare, die de Kneipers dojäje vörjebraht hadden, een mol noh henge lossjonn wöhd. So esset denn och passeeht. Dat Owerverwaltongsgerecht Mönster hät letzde Woch en nem Ielbeschloss de Ömwandlong von Jaststätte en Roocherklubs als "onzolässije Ömjehong vom Roochverbot" verbode (Aktezeeche: 4 B 1771/10). Peng!

Ech persönlech hann nix jäje Flötzer, solang se nor sech selvs schädije on nit angere belästije. An on för sech send de Roocher doch des Staates leevste Kenger. Se brenge -dank de Tabakstüer- dat meeste Jeld en de Kass on nähme am wennichste von de Sozjalkoste en Ansproch, weil se fröher sterwe als de Nitroocher. Dat jildet natörlech nit för die, die jeschmoggelte Fluppe flötze. Äwwer die mösse domet rechne, en decke Strofstüer ze berappe, wenn se jeschnappt wehe.


Nix för onjot. Bes nähste Woch.
Üere
Charle-Manes