letzde Woch hammer hee darjeläht, waröm de Jedenkmönze so düer jewohde send. Hütt send de Scheenches draan. Do säht mr och: "Die künne doch nit düerer wehde." De aktejelle jädefalls nit. Öm die jehdet nit, songern öm sonne, die jesammelt wehde. Von Jeldsching-Nomesmatiker. So wie minn Frönde Lutz Neres on Frank Michel. Denne breng ech von Uslandsreise emmer e paah met. Wie jetz us Usbekestan. Dohen ben ech jeflohe, öm de Nena-Heip en Düsseldorf ze entjonn.

Sonn Sammlerscheensches wehde met de Ziet och düerer. Dat trefft och op Jedenkbanknote zo. Die jibbet näwer Jedenkmönze nämmech och. Stöcker 430 us mieh als hondert Länder weltwiet. Die send jetz en nem nüe Kataloch zosammejefasst wohde: "Gedenkbanknoten der Welt" ussem Gietl-Verlach. Do send alle dren. Met Vörder- on Röcksidde. En Färv. Met ömfassende Anjowe zom Jedenke on Usjowedatom. Natörlech met dem aktejelle Wäht en €. En wahre Fondjrov.

De Eenzelheete send faszeneerend: Jedenknote us Ir- on Schottland met Whisky-Destille drop; ne 10 €URo-Jedenksching von de Europäesche Zentralbank; sonne us Somaliland met selwerne Öwerdrocke, die entewell privat von nem kanadesche Händler jemaht wohde send; Banknote zo Ihre von Che Guevara on de Sportlers Schorch Best on Jäck Nicklaus; ne 10 Mark-Sching von 1989 us de DDR zor Öffnong vom Brandeburjer Dor; ne 10 Rubel-Sching us Transnistrije; dat Unikat zom hondertste Jebohtsdach von de Queen Mum on so wieder on so fott. Dat Boch es e eenzichahdijes Nohschlachwerk on e Moss för jede Jeldschingsammler. Preis: Veehzich €URo; äwwer do jövdet ne verdammp jrote Jäjewäht för. Et lonnt sech. De ISBN es 978-3-86646-530-5.