Wo, bedde, jehts zor Ahornstroß?


Leev Lütt,

en Düsseldorf hammer zerka 2.700 Stroße. Domet send nit nor die jemeent, die "Stroß" em Nome hannt, songern alle alljemeen. En Düsseldorf hannt se öwrijens all Ansproch op ne eejene Nome. Da jehdet nit so zo wie en angere Städt. Mer hannt hee een Ahornallee, eene Ahornbleck on een Ahornstroß. En Kölle jövdet näwer een Ahornstroß alleen veer Ahornwäje. On en Berlin hannt se näwer nem Ahornplatz, nem Ahornsteich on nem Ahornwäch fönf Ahornstroße on 8 Ahornallees!

För de Düsseldorwer Stroße es et Amp för Verkiehrsmänädschmang zoständich. Die hannt e Dotzend Stroßekontrolljänger, die räjelmößich dörch alle Stroße loofe on opnoteere, wenn wat nit en Ordnong es. Dat wöhd dann mieh odder wennijer plöck jemaht. Wenn jenoch Jeld do es. För de Stroßeschelder, sowoll för de Stroßenome als och för de Verkiehrsschelder, jöwet en Düsseldorf eejens ne Werkstattware. Dä deht die reinije, repareere, jrodhänge, uswechsele, nüe anbrenge on zojewachsene vom Jrön befreie. Dat koss em Johr so 1.000 €URo an Matrijal. De Metärbied von de Bevölkerong es erwönscht. Wenner e Scheldche hat, wat fähle deht odder nit en Ordnong es, dohdet däm Amp melde: "verkehrsmangement@duesseldorf.de". Die freue sech dröwer.

Ehr künnt denne och sare, wenn e Stroßescheld falsch jeschreewe es. Denn dovon jövdet noch jenoch hee. Wenn wennich Jeld em Büdjeh es, losse die se us Kostejrönd trotzdäm enfach hänge. Ech hann do äwwer ne Tipp, wie mr bei de Stroßescheldches Jeld spare kann. Enfach de Stroßenome nit mieh so lang mahke, songern kohz on knapp. För zom Beispill wöhd "Olbrichstroß" vollop jenöje anstatts "Jupp-Maria-Olbrich-Stroß". E Scheldche dovon koss wennijer on es trotzdäm klor.


Nix för onjot. Bes nähste Woch.
Üere
Charle-Manes