Sommerkonzäht em Kobi


Leev Lütt,

ofwoll ehsch jet kohz öwer veehzich Johr alt, es et Kobi, dat es dat Städtesche Jymnasiom Koblenzer Stroß en Ohdebach schonn en rennomeehde Scholl. Baas on Liehrkörper do jäwe sech vill Möh, öm de enne anvertraute Ströpp en jode Ertreckong zodeel wehde ze losse on se för et Läwe fit ze mache. Weil de Scholl ne jode Rof hät, wolle och vill Eldere us Nohberjemeende ehr Pänz do anmelde. Dat hät dazo jeföhrt, dat schonn Zojangsbeschränkonge erlasse wehde mossden.

Mangs de Hoope Ärbiedsjemeenschafte, die do zor Uswahl stonn, send och Chorjesang on Musik Schwierponkte. Die Anjebode, die en däm Bereech vorhande send, send villfäldich. För jäde Pennäler/in wöhd met Secherheet jet Passendes jefonge. De Usbeldong erfolcht so, dat de Blare nit nor jet liere, songern dobei och Spaß an de Freud hannt. So wies minne Frönd Justus-Strolch, dä selfs dann noch Trompäte blöst, wenn hä si Huusopjawepensom eejenslech schonn erföllt hät.

Entsprechend hoch es dann och dat musikalesche Niwoh. Alle Jipsnose send janz verpicht drop, nem möchlechst briede Publekom ze zeije, wat se jeliert hannt. Jeläjeheet doför wor am letzde Donnersdach. Do jowet dat desjöhrije Kobi-Sommerkonzäht. En de 2004 errechtete Aula. De Saal wor rabbelvoll. Loss jenget met de Blöserklass 5B. Toll, wat die Pimpfe drop hadden. Et folchden de Onger-, Meddel- on Bowerstofe-Chöre met en villsiddije Uswahl an enjängije Stöcker. Enstodeeht von Hüttes Silvie on Lambert-Brahms Ullala. Dann kom Kuhns Axel met de Blöserklass 6B, dem Junijor- on dem Kobi-Blosorchester. De längere Träningsziet von de höhdere Klasse wor e beredt Zeuchnis för en exzellente Musikertreckong. Der langanhaldende Beifall wor woll verdeent.


Nix för onjot. Bes nähste Woch.
Üere
Charle-Manes