4.823 i-Dötzkes ante portas


Leev Lütt,

des Woch jehdet loss. För 4.823 Ullije bejennt de Ähns des Läwens. Se wehde enjeschollt. En verschiddene Jrondschole. En alljemeene städtesche Haupschole, en blauköppije, jüddesche, ka­tholesche odder freichressleche Konfessjonsschole. En Waldörpschole, enternazjonale odder naz­jonale Schole. För zom Beispiell för Hellene, Japse odder Welsche on so wieder. En Janzdachs- on Halfdachsschole. Bezahle deht dat en de Haupsach de öffensleche Hangk. Dat jildet zomennes för de öffensleche Schole. Bei de private mösse de Eldere off kräftich en de Kurantebüdel lange.

De mieschde Rotzije freue sech op de Scholl. Se wohden och jot drop enjestemmt. Sowoll dörch de Kengerjähde als och dörch de Eldere, de Jroß on de Pate. Dat Enjebondesinn en de Vörberie­donge, wobei se jo emmer em Meddelponkt stonnt, wor en jode Motevazjon. Wies zom Beispill dat Metwerke beem Koof vom Tornester on de Jrondusstattong. Dat Drömeröm es werklech nit von Pappe. Alleen de Froch: Solle die ärme Pänz nu onger de Last von nem tonneschwiere Tornester zosammebreche? Odder jövt mr denne besser ne Rolltrolli, wo se all ehr Plürre rendonn künne, on dä sech dann janz leecht trecke lösst? Lösong: Do, wo vill Treppe on Stofe send, es ne Leechtjewechtsranze woll besser als ne Trolli, weil dä konstrukzjonsbedengt e höhderes Eeejejewecht hät.

De Ussecht op en jrote Scholltöt brengt de Ööjelches zom Löchde on lösst de Häzzkes höhder schlare. So och bei minne Frönd Freddy. Jrod zoröck ussem "Alles-enjeschlosse-Urlaub" op Malle, wo hä noch zwee Melchzäng lossjewohde es, kunnt hä et koom afwahde. Als Höheponkt  kömmt noch de Bullizei: Schollwächsecherong on Oppasse, dat ki Äutoke zo plöck lans de Scholl fährt.


Nix för onjot. Bes nähste Woch.
Üere
Charle-Manes
 
i Dötz