et mösst schonn Weihnahde on Poschde op eene Dach falle, wenn ons Afjeordnete sech nit drop eenije künnden, sech selfs räjelmäßich mieh an Kohle en de Täsche ze stopfe. Dat es noch secherer als dat Amen en de Kerch. Jetz hannt de jroße Parteie (SPD, CDU on Jröne) hee em Landdach sech mal widder ne kräftije Schluck us de Pulle jenämmicht on eenmödich beschlosse, sech ehr ohnehen schonn öppijes Aldersjeld öm 500 € op 2114 € opzestocke. Dat send die, die bei normale Rentener on Hartz IV-Empfänger för Nullronde plädeere. Mar de F. D. P. on de Lenke ziere sech e besske on versöhke, de Endrock ze erwecke, als wöre se domet nit so janz enverstange.

Ne wiedere mangs die maßlosse Polliteker es Lammerts Nöppes, Baas vom Bondesdach. Dä hät doch letzdens ne Versochsballong jestartet, of emm, als formal zweethöhsdem Mann em Staat, nit och e paah Priveläjie mieh zojeschostert wehden künnden. Via Huushaltsusschoss leeß hä uslote, off hä noch sinnem Usscheede ussem Amp si Bürro (met Sekretärin) on sinne Deenstware (met Schofför) nit nor för veer, songern för e Dotzend Johr hann künnt. Weil sech afzeechnete, dat et met en Miehheet doför jet schwierich wehde künnt, es dat Projekt vorlööfich zoröckjestellt wohde.

Dann send do noch die, die meene, dat Anspröch, die se us verschiddene öffensleche Tätichkeete hädden, enfach addiert wehden künnden. Äwwer dat jeht nit. Dat hät jetz dat Bondesver-waltongsjericht en Leipzich entscheede on domet en Klach vom Exfinanzminester Hännes Eichel afjewiese. Met en die Reih von sonn Schubijacke, die en ähnleche Fäll vör Jericht jetrocke send, jehöre och Exbaas von de Bondesbank Ähnz Welteke on de ihemolije (RE)-Landrat Schäng-Jochem Welt.